ಗುಬ್ಬಿ ಮತ್ತು ಮುಂಬೈ

ಬೆಂಗಳೂರಿನಲ್ಲಿ ಗುಬ್ಬಿಗಳೇ ಇಲ್ಲ. ಹೌದು ತುಂಬಾ ವರ್ಷಗಳೇ ಆದವು, ಗುಬ್ಬಿಗಳ ಸಂತತಿ ನಶಿಸಿ ಹೋಗಿ. ಮೊಬೈಲ್ ಬಂದಮೇಲೇನೆ ಹೀಗೆಲ್ಲ ಆಗಿರೋದು. ಮೊಬೈಲ್ ಟವರ್, ಮೊಬೈಲ್‌ನಿಂದ ಬರುವ ತರಂಗಗಳು ಅವುಗಳ ಅವನತಿಗೆ ಕಾರಣ.

ಇದೆ ಅಲ್ಲವೇ ಎಲ್ಲರೂ ಹೇಳಿದ್ದು, ಹೇಳುತ್ತಿರುವುದು?

ಹೌದಾ? ನಿಜವಾಗಿಯೂ ಗುಬ್ಬಿಗಳೇ ಇಲ್ಲವೇ? 

ನಾವಂತೂ ನಮ್ಮ ಮನೆಯ ಸುತ್ತ ಮುತ್ತ ಗುಬ್ಬಿಗಳನ್ನು ನೋಡಿ ವರ್ಷಗಳೇ ಆಗಿದೆ. ಎಲ್ಲೋ ಅಪರೂಪಕ್ಕೆ ಒಮ್ಮೆ ಮನೆಯ ಬಳಿ ಬಂದ ಎರಡೇ ಎರಡು ಗುಬ್ಬಿಗಳನ್ನು ನೋಡಿ ಬಹಳ ಸಂತಸ ಪಟ್ಟು, ಫೋಟೋ ತೆಗೆಯಲು ವಿಫಲ ಪ್ರಯತ್ನ ನಡೆಸಿದ್ದೆ. 

ಅಮೇಲಂತೂ  ನೋಡೇ ಇಲ್ಲ. ಗುಬ್ಬಿಗಳೇ ಏಕೆ, ಕಾಗೆಗಳೂ ಸಹ ಅಷ್ಟಾಗಿ ಕಾಣಸಿಗುವುದಿಲ್ಲ. ಬಹಳ ಅಪರೂಪ.

ಶ್ರಾದ್ಧ ಕರ್ಮ ಮಾಡಿ ಪಿಂಡ ಇಟ್ಟು ಕಾಗೆಗಳಿಗೆ ಕಾದರೆ ಬರುವುದು ಕೇವಲ ಪಾರಿವಾಳಗಳು. 

ಯಾರೋ ಹೇಳಿದರು, ಪಾರಿವಾಳಗಳು ಇದ್ದ ಕಡೆ ಕಾಗಗಳಿಗೆ ಉಳಿಗಾಲವಿಲ್ಲ ಎಂದು. ಎಷ್ಟು ನಿಜವೋ ಗೊತ್ತಿಲ್ಲ, ಆದರೆ ಪಾರಿವಾಳಾಗಳಿರುವಷ್ಟು ಕಾಗೆಗಳಂತೂ ಇಲ್ಲ.

ಹಾಗಿದ್ದರೆ ಗುಬ್ಬಿಗಳೂ ಸಹ ಇದೆ ಕಾರಣಕ್ಕೇನಾದರೂ ಕಣಸಿಗುತ್ತಿಲ್ಲವೋ ಅಥವಾ ನಿಜವಾಗಿಯೂ ಮೊಬೈಲ್‌ನ ಹಾವಳಿಯಿಂದಲೋ ?

ಆದರೆ ನಾನು ಕೊಲ್ಲಾಪುರಕ್ಕೆ ಹೋದಾಗ, ಪುಣೆಗೆ ಹೋದಾಗ ಅಥವಾ ಪ್ರತೀ ವರ್ಷ ಮುಂಬೈಗೆ ಹೋದಾಗ ಬಹಳಷ್ಟು ಗುಬ್ಬಿಗಳನ್ನು ನೋಡುತ್ತಿದ್ದೆ. ಎಲ್ಲೆಂದರಲ್ಲಿ ಸ್ವಚ್ಛಂದವಾಗಿ ಚಿವ್ಗುಟ್ಟುತ್ತಾ ಹಾರಾಡುತ್ತಿರುತ್ತಿತ್ತು. ಹಾಗಾದರೆ ಅಲ್ಲೆಲ್ಲ ಮೊಬೈಲ್ಗಳೇ ಇಲ್ಲವೇ? ಖಂಡಿತ ಅಲ್ಲ. ಕೊಲ್ಲಾಪುರ ಏನೋ ಚಿಕ್ಕ ಊರು ಮೊಬೈಲ್‌ನ ಬಳಕೆ ಕಡಿಮೆ ಇರಬಹುದು ( ಈಗ ಸಣ್ಣ ಸಣ್ಣ ಹಳ್ಳಿಗಳೂ ಸಹ ಮೊಬೈಲ್ ಹಾಗೂ ಮೊಬೈಲ್ ಟವರ್ನ  ಹೊರತಾಗಿಲ್ಲ) ಆದರೆ ಪುಣೆ ಹಾಗೂ ಮುಂಬೈ? ಅಲ್ಲಿನ ಜನಸಂಖ್ಯೆ ನಮ್ಮಲ್ಲಿಗಿಂತಲೂ ಅಧಿಕ. ಆ ಕಾರಣಕ್ಕಾಗಿ ಮೊಬೈಲ್‌ನ ಉಪಯೋಗವೂ ಅಧಿಕ. ಮತ್ತೇಕೆ ಅಲ್ಲಿ ಗುಬ್ಬಿಗಳಿಗೆ ತೊಂದರೆ ಆಗಿಲ್ಲ? 

ಪಾರಿವಾಳಗಳೂ ಸಹ ಅಧಿಕವಾಗೆ ಇವೆ. ಕಾಗೆಗಳು ಸ್ವಲ್ಪ ಕಡಿಮೆಯೇ.

ಮೊನ್ನೆ ಮುಂಬೈಗೆ ಬಂದಾಗ ಗಮನಿಸಿದ್ದು ಮತ್ತಷ್ಟು ಗುಬ್ಬಿಗಳ ವೃದ್ದಿ. ನೋಡಿ ಬಹಳ ಸಂತಸವಾಯಿತು, ಫೋಟೋ ತೆಗೆದೆ, ವೀಡಿಯೋ ಮಾಡಿಕೊಂಡೆ. 

ಹಾಗಿದ್ದರೆ ಮುಂಬೈನಂತ ಮಹಾನಗರಿಯಲ್ಲಿ ಗುಬ್ಬಿಗೇನು ಸವಲತ್ತುಗಳಿವೆ? 

ಅಲ್ಲಿಯವರೇನು ಅದಕ್ಕಂತ ಹೊಸದಾಗಿ ಊಟ ಉಪಚಾರ ಮಾಡುವವರಲ್ಲ, ಕಾಳು ಕಡಿ ಹಾಕುವುದಿಲ್ಲ. 

ಅಲ್ಲಿನ ಒಂದೇ ಒಂದು ಮುಖ್ಯ ಪರಿಸರ ಎಂದರೆ ಅಲ್ಲಿನ ಹಳೇ ಕಟ್ಟಡಗಳು.

ಹೌದು, ಗುಬ್ಬಿಗಳು ಇತರೇ ಪಕ್ಷಿಗಳಂತೆ ಗೂಡು ಕಟ್ಟುವುದಿಲ್ಲ (ಮೊನ್ನೆ ಎಲ್ಲಿಯೋ ಓದಿದಾಗ ಗಮನಕ್ಕೆ ಬಂದಿದ್ದು, ಬಹುಶಃ ಪೂಚಂತೇ ಅವರ ಯಾವುದೋ ಪೇಜ್‌ನಲ್ಲಿ). ಅವು ಕೇವಲ ಸಂಧಿ, ಮಾಡಗಳಲ್ಲಿ ಹುಲ್ಲು ಕಡ್ಡಿ ಹತ್ತಿಯನ್ನಿಟ್ಟು ಗೂಡು ಮಾಡಿಕೊಳ್ಳುತ್ತವಂತೆ. ಪಾರಿವಾಳಗಳು ಎಲ್ಲೆಂದರಲ್ಲಿ ಆರಾಮಾಗಿ ವಾಸಿಸಬಲ್ಲವು. ಹಳೇ ಕಟ್ಟಡವಾಗಲೀ, ಹೊಸದಿರಲಿ ಸ್ವಲ್ಪ ಜಾಗ ಸಿಕ್ಕರೆ ಸಾಕು. ಗುಬ್ಬಿಗಳಿಗೆ ಹಾಗಲ್ಲ. ಅವುಗಳಿಗೆ ಸಂಧಿ, ಗೋಡೆಯ ಅಥವಾ ಕಿಟಕಿಯ ಸಜ್ಜೆಯ ಯಾವುದೋ ಗೂಡು (ಮುಕ್ಕಾಲು ಭಾಗ ಮುಚ್ಚಿರುವಂತದ್ದು) ಇನ್ನಾವುದೋ ಹಂಚಿನ ಸಂಧು, ಸಿಮೆಂಟ್ ಶೀಟ್‌ನ ಕೆಳಭಾಗ ಹೀಗೆ. 

ಮುಂಬೈನಂತಹ ಮಹಾನಗರ ಎಷ್ಟೇ ಬೆಳದಿದ್ದರೂ, ಅಲ್ಲಿ ಈಗಲೂ ಹಳೇ ಕಟ್ಟಡಗಳಿಗೆ ಕೊರತೆಯಿಲ್ಲ. ಪ್ರತೀ ಹೊಸ ಕಟ್ಟಡದ ಪಕ್ಕದಲ್ಲಿ ಹತ್ತಿಪ್ಪತ್ತು ಹಳೇ ಕಟ್ಟಡಗಳೂ, ಒಂದೆರಡು ಗುಡಿಸಲುಗಳೂ ಇದ್ದೇ ಇದೆ. ಇನ್ನು ಎಲ್ಲಾ ರೈಲು ನಿಲ್ದಾಣಗಳಲ್ಲಿ, ಹಳೇ ಅಂಗಡಿಗಳಲ್ಲಿಯೂ ಸಹ. ಗುಬ್ಬಿಗಳಿಗೆ ಅದು ಪ್ರಶಸ್ತ ಜಾಗ. 

ಹೀಗಾಗಿ ಅಂತಹ ಮಹಾನಗರ, ಅಷ್ಟೊಂದು ಜನಸಂಖ್ಯೆ, ಅಷ್ಟೊಂದು ಪಾರಿವಾಳಗಳ ನಡುವೆಯೂ ಗುಬ್ಬಿಗಳಿಗೆ ಬರ ಇಲ್ಲ. ಸಾವಿರಾರು, ಲಕ್ಷಗಳ ಸಂಖ್ಯೆಯಲ್ಲಿ ಸ್ವಚ್ಛಂದವಾಗಿ ಹಾರಾಡಿಕೊಂಡಿವೆ. 

ಅದೇ ಬೆಂಗಳೂರು ಬೆಳೆದಿದ್ದು ಇತ್ತೀಚೆಗೆ, ಹೊಸ ಹೊಸ ಬಡಾವಣೆ, ಹೊಸ ಕಟ್ಟಡಗಳು. ಅಷ್ಟೇ ಅಲ್ಲದೆ ಇಲ್ಲಿ ಅಪಾರ್ಟ್ಮೆಂಟ್ನ ಪದ್ದತಿಯೂ ಸಹ ಇತ್ತೀಚಿನ ವರ್ಷಗಳಲ್ಲಿ ಶುರುವಾದದ್ದು, ಅದೂ ಸಹ ಹೊಸ ಅವತಾರಗಳಲ್ಲಿ. ಇಲ್ಲಿನ ಮನೆಗಳಲ್ಲಿ ಕಾಂಕ್ರೀಟ್‌ನ ಸಜ್ಜೆಗಳೇ ಹೆಚ್ಚು. ಮುಂಬೈನಲ್ಲಿ ಕಬ್ಬಣದ ಗ್ರಿಲ್‌ಗಳನ್ನು ಮಾಡಿ ಶೀಟ್ ಹಾಕಿಬಿಡುತ್ತಾರೆ. ಹಾಗೂ ಅಲ್ಲಿ ಅಪಾರ್ಟ್‌ಮೆಂಟ್‌ಗಳು ೪೦-೪೫ ವರ್ಷಗಳಿಗೂ ಹಳೆಯದು.  ಹೀಗಾಗಿ ಗುಬ್ಬಿಗಳಿಗೆ ಮುಂಬೈನಂತ ಮಹಾನಗರಗಳು ಹೇಗೆ ಒಗ್ಗಿದೆಯೋ ಹಾಗೆ ಬೆಂಗಳೂರು ಒಗ್ಗಿಲ್ಲ. 

ಬಹುಶ ಹಳೇ ಬೆಂಗಳೂರು ಅಂದರೆ ಮೆಜೆಸ್ಟಿಕ್, ಚಿಕ್ಕಪೇಟೆ, ಮಲ್ಲೇಶ್ವರದ ಮಾರುಕಟ್ಟೆ ಈ ಜಾಗಗಳಲ್ಲಿ ಗುಬ್ಬಿಗಳು ಕಾಣಸಿಗಬಹುದು, ಆದರೂ ಕಡಿಮೆಯೇ. 

ಒಟ್ಟಿನಲ್ಲಿ ಮೊಬೈಲ್ ಹಾಗೂ ಮೊಬೈಲ್ ಟವರ್‍ನಿಂದ ಅನ್ನುವುದಂತೂ ಸತ್ಯಕ್ಕೆ ದೂರವಾದ ಮಾತು.